Villaviciosa amuesa’l so nuevu estilu nel Espace Marine de Lorient

La La Banda de Gaites “Villaviciosa-El Gaitero” ufrió esti xueves un conciertu nel Esapce Marine, dientro de les sesiones folk del Festival de Lorient, colo que se ponía puntu y final a la participación asturiana nesti espaciu, dempués de l’ésitu de les participaciones de la Banda El Gumial y el grupu San Félix.

Con una una puesta en escena sobria pero amañosa, la Banda de la Villa amosó como ta desenvolviendo la so transición, col renovación de bona parte de los sos componentes nestos años caberos y una nueva direición. La incorporación de cuerdes y de flautes al productu final tan averando a la Banda por nuevos caminos de los que tien de xurdir un nuevu estilu que ya se camienta.

Asina lo dexaron afitao nesta actuación, na que cuntaron col sofitu del grupu San Félix de Candás p’adornar les pieces baillables del repertoriu de la Banda.

Nos sos 20 años d’esistencia, la Banda de Gaita Villaviciosa llevó la so música por toos lo rincones d’Asturies y a numberosos puntos de la xeografía d’España, pero tamién a dellos países d’Europa y América. Y ye la banda de gaites asturiana que más vegaes participó nel Festival Intercélticu de Lorient: nos años 1990, 1991, 1995, 1998, 2000, 2005, 2012 y agora en 2018.