Un “País Malva” concentráu pa un Lorient distintu

Lorient acoyó esti añu un proyeutu distintu del qu’esti mesmu coleutivu de Muyeres estrenara na década pasada,  “un proyectu pola igualdá”, como lu nomó’l productor musical Fernando Ornosa nel so estrenu n’Asturies: “País Malva”, que se basa nes grabaciones realizaes polos primeros musicólogos del sieglu XX que documentaron la música tradicional.

El colectivu Muyeres dio una vuelta de tuerca a eses grabaciones del sieglu pasáu y actualizó ‘l discursu  que preparó pal so conciertu del llunes nel Grande Theatre de Lorient con una versión concentrada del espectáculu. Los testos,  realizaos por nueve escritores, falen abondo de la pluralidá que quieren reflexar del mundu de les muyeres y que supieron amosar en Lorient. Col acortamientu, l’espectáculu gana en comunicación col espectador y albídrase más afayáu a toa mena de públicu, pero pierde daqué de mensaxe, mas completu na versión orixinal.

El vestuariu cobra especial relevancia nel espectáculu. Ta desvenceyáu de la indumentaria tradicional, ye eclécticu y presenta igualmente la pluralidá de les muyeres, como dende l’entamu del proyeutu quixo qu’asocediera Azucena Bedia, encargada de los paxellos que reflexen les distintes dómines personales de les participantes nel espectáculu. Embaxo la uniformidá malva, preséntense les distintes personalidaes de cada muyer, toes asturianes, pero toes distintes, exemplu vivu de lo que ye Asturies, femenina y plural.

Llangréu (Asturies), 1962. Llicenciáu en Filoloxía Hispánica y Master en Desenvolvimientu Local pola Universidá d'Uviéu ye tamién espertu n'Alministración de Servidores Web pola Universidá de Granada. Doctorando de la Universidá del País Vascu, ye Profesor Acomuñáu de la Universidá Carlos III de Madrid, onde imparte l'asignatura de Técniques de Llocución y dirixe tamién el Cursu d'Espertu en Periodismu Dixital de la Universidá d'Uviéu y los cursos de branu sobre esta materia de la mesma universidá, cuntando con una nutrida participación nos cursos de branu de la Universidá de Cantabria y de la Complutense de Madrid, ente otres, siempres en relación col periodismu dixital.