El xueves marca l’ecuador del Festival de Lorient cola celebración de la recepción na subprefactura a les Delegaciones, que tuvo nel grupu de baille Fitoria la representación asturiana, y cola fiesta italiano-asturiana que se desenvuelve informalmente dende hai dos décades nel albergue onde s’alcuentra la delegación. Pero esti añu, el festexu tuvo menos brillu por mor de la lluvia que dominó na nueche bretona y que lleva persiguiendo dellos díes el espectáculu cimeru y representativu del Festival: La Nueche Máxica.
Na recepción oficial del Subprefectu francés a les delegaciones, l’asturiana tuvo representada por ocho de les componentes del Grupu de Baille Fitoria qu’ufrieron a mou de grupu pandereteres una actuación con delles pieces tradicionales de nueso.