La TPA merca esti añu los derechos de La Grande Parade de Lorient

La noticia p’Asturies d’esti añu, alrodiu del desfile que simboliza’l triunfu cultural de les naciones celtes en Lorient, xunta les nueches máxiques, nun foi l’esitu adelantáu pol bon tiempu del tradicional desfile que lleva por nome la “Grande Parade”, sinon la decisión de la RTPA de mercar los derechos conxuntamente cola TVGA pa emitir el desfile y tenelu a disposición na so TPA a la carta a lo llargo d’un mes.

Pero aparte d’esa novedá pala delegación asturiana, el restu foi una repetición de los años caberos, nos que’l tiempu soleyeru perafitó l’ésitu de participación y de públicu d’un espectáculu qu’hai años que tien cobertura nacional na República y seguimientu xeneralizáu de calter internacional, munchu más nesti añu d’Escocia, nel que’l gobiernu escoces quier dexar bien afitao so apueste cultural como referencia identitaria.

Hay más seguridá tamién nel Festival, pero como’l añu pasáu una cosa nun camudó: l’entusiasmu popular polo que significa Lorient y el desfile, en concretu, pa tolos que s’averen por esta villa na primer fin de selmana de agostu. L’ensame, siella plegable o taburete sol brazu, axuntábase sobremanera na llarga recta na que France 3  asitiara toles sos cámares y un estraordinariu espliegue como cada entamar d’agostu. Y ende, y en realidá en tol percorríu, esfrutase d’un maraviyosu espectáculu de cási cuatro hores ensin interrupción, que combina dende les gaites del país homenaxáu anguaño, Escocia, a los primos irlandeses y los encaxes tallaos de los siempres perapaludíos vistíos tradicionales bretones.

Nunca la rue de la Ferriere, el corazón palpitante del puertu pesqueru de Lorient, ye tan allegáu nun domingu pela mañana como esti primer sábadu d’agostu, magar esti añu s’acortare unos diez minutos el percorríu. Ente 70.000 persones , según los medios locales y les cerca de 100.000 calculaes pola televisión y refrendaes pola organización, siguieron l’acontecimientu en directu, a pié de cai. Y de ellos, unos 7.000 aficionaos prefirieron Moustoir p’animar a la familia de les naciones celtes na llegada, qu’esti añu se produxo muncho antes de que yera vezu, durando’l desfile de cada frupu poco más de media en llugar de la llarga hora que solíen echar en facer el percorríu. Daqué que permitió que poco dempués de la una de la tarde, con tiempu asgaya pala xinta, finara’l Desfile.

La delegación asturiana

Los asturianos salieron anguaño separaos y non arrexuntaos como en 2016. Primeramente, el grupu Xeitu yá desfilara saliendo a les 10,30 del Puertu de Pesca, a la media hora d’empecipiase’l desfile y con un sol de xusticia que nun abandonó en tola mañana.

Y alrodiu les 11,30 la Banda de Gaites de Candás empecipió’l so desfile poles cais de Lorient qu’acabó una hora dempués ente continuos apalusos del públicu nel Estadiu de Moustoir. Cola bandera ástur acompañando a la de la mesma Banda de Gaites, combinaron pasacais en columnes magníficamente remanaes en pasos angostos y curves pronunciaes del percorríu ente’l puertu pesqueru y l’estadiu.

Culturebox, la oferta cultural desenvuelta por France Télévision proponte en You Tube revivir, si nun quies esperar a la TPA, el gran Desfile del Festival interceltique de Lorient 2017.

Llangréu (Asturies), 1962. Llicenciáu en Filoloxía Hispánica y Master en Desenvolvimientu Local pola Universidá d'Uviéu ye tamién espertu n'Alministración de Servidores Web pola Universidá de Granada. Doctorando de la Universidá del País Vascu, ye Profesor Acomuñáu de la Universidá Carlos III de Madrid, onde imparte l'asignatura de Técniques de Llocución y dirixe tamién el Cursu d'Espertu en Periodismu Dixital de la Universidá d'Uviéu y los cursos de branu sobre esta materia de la mesma universidá, cuntando con una nutrida participación nos cursos de branu de la Universidá de Cantabria y de la Complutense de Madrid, ente otres, siempres en relación col periodismu dixital.