La representación asturiana brilló na Grande Parade de Lorient col valir que cada añu amuesa’l nuesu folklor nel Festival

Como tolos años el primer domingu de los dos que xunta la programción musical del Festival Intercélticu más nomáu y que se celebra en An Oriant, les cais de la ciudá bretona enllenense d’un espíritu y un entusiasmu popular que nun se ye a entender dende Asturies con facilidá. Y llénense agora, pero tamién hai tiempu cuando’l públicu pagaba por ver el desfile a pié de la cai, polo que significa Lorient y el desfile, en concretu, pa tolos que s’averen por esta villa esti día.

L’ensame cimeru del Festival de Lorient, ente la siella plegable o taburete sol brazu, axuntábase sobremanera na llarga recta al entamu del desfile, al llau del Puertu de Lorient, na que France 3 asitiara toles sos cámares y estraordinariu esplegue. La televisión rexonal francesa retresmitía’l desfile, esta vegada, entamando un documental con Asturies, Cornuales y la Isla de Man como referencies, y la RTPA facíalo cola señal de FR3 na so páxina web, ensin malpenes anuncialo. El Port de Peche, onde nos caberos años finaba’l desfile en llugar del Estadiu de Moustoir, diba ser el llugar onde nesti 2015 entamaben a desfilar les bandes enantes d’andar los dos kilómetros que separen los dos puntos de la villa. Y l’Estadiu tornó a ser el puntu final d’esti percorríu de cuatro hores de coloríu y maxestuosidá de la tradición musical y folklórica de los países del Arcu Atlánticu.

Parte de la delegación asturiana salió nos primeros puestos de les 74 agrupaciones que componíen esti añu’l desfile, dende les primeres n’abrilu (le Drapeau des Nations Celtes y la Bagad de Lann Bihoué de Lorient) hasta los bomberos de la provincia de Morbihan que pesllaben el desfile. Abrió’l mesmu cola bandera ástur y nel puestu 11 Xulián Suárez, de la Banda de Gaites El Trasno de Cuaña que cola harmonía a la que nos tien avezaos y la dirección de Javier Tejedor ufrió un perguapu programa a los lorienteses. Un programa nel que s’incluyíen pieces como Fontenda, el Saltón de Rendueles o Baldomero, ensin escaecer la Sabicheira de los Tejedor.

El Grupu de Baille Filandón salió na metá del Desfile (nel puestu 25)  y tuvo que caminar pente’l sol del meudía, pero recibió los acaloraos aplausos d’un públicu, el bretón, qu’aprecia fondamente a la delegación asturiana, entá más nomada dende que Lisardo Lombardía entamara hai unos años a dirixir el Festival intercélticu más importante del mundu. Fízolo gracies a una bandina de 5 instrumentos (bombo, acordión, dos gaites y tambor) que tenía músicos de la talla del recién ganador per dos vegaes del MacCrimmon, Álvaro Álvarez, y Nel Exposito, de Felpeyu. Y gracies tamién a que presentó un prestosu programa con xotes, pasacais y marches tradicionales, resaltáu con un montaxe de la Muñeira del Centro que prestó enforma al públicu.

Y nel puestu 44 toco-y salir a la Banda de Gaites Lakadarma, la más moza de la representación y la que más arriesgara nel desfile, incorporando una seición de metal colos músicos de l’Alambique Electrique, que sofitaron perbien l’esfuerciu de la banda combinando pasacais en columnes magníficamente remanaes en pasos angostos y curves pronunciaes del percorríu ente l’Estadiu y el puertu pesqueru. Too ello con un programa musical festivu, qu’incluyía bandes sonores como la del Equipu A y otres apuestes qu’encantaron al públicu del Festival.

 

Galería de Fotos de La Grande Parade de Lorient 2015

Llangréu (Asturies), 1962. Llicenciáu en Filoloxía Hispánica y Master en Desenvolvimientu Local pola Universidá d'Uviéu ye tamién espertu n'Alministración de Servidores Web pola Universidá de Granada. Doctorando de la Universidá del País Vascu, ye Profesor Acomuñáu de la Universidá Carlos III de Madrid, onde imparte l'asignatura de Técniques de Llocución y dirixe tamién el Cursu d'Espertu en Periodismu Dixital de la Universidá d'Uviéu y los cursos de branu sobre esta materia de la mesma universidá, cuntando con una nutrida participación nos cursos de branu de la Universidá de Cantabria y de la Complutense de Madrid, ente otres, siempres en relación col periodismu dixital.