La Grande Parade de Lorient amuesa la bona organización y criteriu del FIL

L’apueste de Lorient yera grande, porque les presiones pa suspender les conglomeraciones nos festivales en Francia fueron notables, pero la decision de la organización y les autoridaes locales tuvo una respuesta positiva coronando con un indiscutible ésitu la tradicional Grande Parade.

En Francia, esti branu, Festivales como’l de Lille foron suspendíos pola presión de les autoridaes de la República pa evitar riesgos en conglomeraciones ante posible atentaos. Pero con inversion en seguridá y bona organización el Festival Intercélticu de Lorient demostró que los riesgos son mínimos y coronó la primer fin de selmana de’l Festival con ésitu y seguridá plenes.

El festival cierra les sos carpes y música media hora primero que’l pasáu añu, les midíes de seguridá son constantes, revisándose cada bolsu y mochila. Esos son los cambeos que nota l’espectador, amás de presencia policial bien visible.

Pero una cosa nun camudó: l’entusiasmu popular polo que significa Lorient y el desfile, en concretu, pa tolos que s’averen por esta villa na primer fin de selmana de agostu. L’ensame, siella plegable o taburete sol brazu, axuntábase sobremanera na llarga recta na que France 3 (la televisión rexonal que retresmite en diferíu’l desfile a partir de -yos 15,30 hores) asitiara toes los sos cámares y estraordinariu esplegue.

Y ende, y en realidá en tol percorríu, esfrutase d’un maraviyosu espectáculu de cási cuatro hores ensin interrupción, que combina dende les gaites del país homenaxáu anguaño, Australia, a los primos escoceses y los encaxes tallaos de los vistíos tradicionales bretones.

Nunca la rue de la Ferriere, el corazón palpitante del puertu pesqueru de Lorient, ye tan allegáu nun domingu pela mañana como esti primer sábadu d’agostu. Ente 70.000, según los medios locales y los cerca de 100.000 calculaos pola televisión y refrendáu pola organización, siguieron l’acontecimientu en directu, a pié de cai. Y de ellos, unos 7.000 aficionaos prefirieron Moustoir p’animar a la familia de les naciones celtes na llegada.

La delegación asturiana

Los asturianos salieron anguaño arrexuntaos, colo que la so presencia destacó de manera más eficaz. Primeramente, el colectivu Muyeres yá desfilara saliendo a les 10,30 del Puertu de Pesca, a la media hora d’empecipiase’l desfile y con un sol de xusticia que nun abandonó en tola mañana.

Y a les 11,30 el Grupu Trebeyu y la Banda de Gaites La Llaguna del Torollu empecipiaron el so desfile poles cais de Lorient qu’acabó una hora dempués ente continuos apalusos del públicu nel Estadiu de Moustoir. Cola bandera ástur acompañando a la de la mesma Banda de Gaites, La Llaguna del Torollu combinó pasacais en columnes magníficamente remanaes en pasos angostos y curves pronunciaes del percorríu ente’l puertu pesqueru y l’estadiu. Y Trebeyu foi sapicando el percorríu con actuaciones que suponíen una llamada al públicu pa la so primer actuación nel Space Marin d’esti martes 9 d’agostu.

Llangréu (Asturies), 1962. Llicenciáu en Filoloxía Hispánica y Doctor en quidá e innovación educativa pola Universidá d'Uviéu. Anguaño ye profesor de llingua española y lliteratura del cuerpu profesores de Secundaria del Principáu d'Asturies y Profesor Asociáu de la Universidá d'Uviéu nel Departamentu de Ciencies de la Educación. Periodista a lo llargo de más de 35 años, tien una llarga trayectoria llaboral en medios como La Voz d'Asturies, RNE, TVE y TPA ente otros.