La delegación asturiana d’esti 2015 entama’l viaxe al Festival de Lorient

La delegación asturiana entamaba a les 8 de la nuechi so viaxe a Lorient pa aportar mañana vienres a la villa bretona y participar  nes primeres actividaes d’esti añu. Les bandes de gaites y grupos de folk, compartieron viaxe cola prensa desplazada y colos gaiteros qu’esti sábadu competirán nel Troféu McCrimmon cola delegación gallega, entamando asina un programa d’actividaes bien intensu, nel que tamién va brillar el sábadu, l‘actuación de Xuacu Amieva nel Palaciu de Congresos de Lorient, con una actuación que repetirá otra vuelta’l martes.

El sábadu 8 d’agostu’l cuartetu Amieva va presentar en Lorient el trabayu del violonista Yann El Nay, Erwan Ganier, Clara Diez-Marcáis como vocalista y Fañch Loric al Acordión Diatonicu. Proponen una música propia del baille bretón que s’atopa nuna Fest-Noz, asina como pieces qu’entemecen el cantar tradicional Ástur y lamelodía Bretona, no que ye un perbon mix enérxicu y novedosu qu’amuesa qu’Asturies y Bretaña nun s’alcuentren tan alloñaos.

El domingu 9 d’agostu nel Gran Teatru tocará-y al grupu Tejedor representar a Asturies, con un conciertu que va preceder a les actuaciones que fadrán depués individualmente José Manuel y Javier los dos hermanos que xunta Eva componen la base del grupu. El martes, l’Espaciu Marine va acoyer a La Banda de Gaites El Trasno,  que foi creada en 1999,  a la vera de  la escuela de Música Tradicional de Coaña (Asturies). En  2013, salía’l so primer álbum, “Axeitín”, una palabra que significa “movese ensin faer de ruiu, con dulzura, a modo”. Un álbumque  va recibir dellos compenses tales que’l Premiu al Meyor Cantar por “Volviche”. Y el miércoles llegará-y el turnu a LaKadarma, un nuevu proyectu musical que s’interesa al desenvolvimientu de la música tradicional asturiana incorporando de les nueves sonoridaes y arreglos a la gaita asturiana y tamién recibiendo influencies abondes de distintos estilos. L’Asociación, fundada en febreru de 2012 embaxo la dirección musical de los hermanos Rodrigo y Andrea Joglar, componse de músicos de distintes propiedaes de la música tradicional asturiana, tantu del mundu de les bandes de gaites como de grupos de música folk, pero tamién de solistes de gaita o d’estudiantes de la Escuela Municipal de Música de Nava.

El xueves va ser el grupu Cerezal el que represente al país. Un grupu que ye’l resultáu de distintes influencies musicales. La riqueza y la orixinalidá de la música de Cerezal vien de la diversidá de los y les artistes que se xunieron al proyectu dende’l so entamu: principalmente folk, influyíu amás pol jazz y country. Cerezal, arreyáu a los sos oríxenes, retoma temes salíos de la tradición oral asturiana.

El baille asturianu va aportar a los grandes escenarios de Lorient el vienres 14 d’agostu col grupu de baille tradicional asturiana Filandón que foi creáu en 1999 n’Uviéu cola fin d’empobinase al espardimientu de los bailles, músiques y tradiciones d’Asturies y que se compón d’una cuarentena de persones que s’aconceyaben ya dende l’aniciu nel grupu de baille, de pandereteres, una bandina tradicional  y una cantante de tonada. Les sos pieces tradicionales consíguense gracies a los trabayos d’investigación que xurdieron d’un equipu d’investigaciones formáu polos miembros del grupu.

 

 

Llangréu (Asturies), 1962. Llicenciáu en Filoloxía Hispánica y Doctor en quidá e innovación educativa pola Universidá d'Uviéu. Anguaño ye profesor de llingua española y lliteratura del cuerpu profesores de Secundaria del Principáu d'Asturies y Profesor Asociáu de la Universidá d'Uviéu nel Departamentu de Ciencies de la Educación. Periodista a lo llargo de más de 35 años, tien una llarga trayectoria llaboral en medios como La Voz d'Asturies, RNE, TVE y TPA ente otros.