Jesús Fernández gana’l MacCrimmon nun concursu calcáu del de 2013

El gaiteru asturianu Jesús Fernández ganó’l Troféu Mc Crimmon de gaita solista que’l Festival de Lorient dedica a les gaites asturianes y gallegues nuna dura competición na que se punxo de manifiestu’l nivel qu’algamó la interpretación d’esti preséu nacional de toles naciones celtes d’Europa.


Nuna dura competición na que la igualdá amosóse nidiamente, Jesús Fernández superó al gallegu Xesús Rodríguez y al asturianu Fernando Vázquez, no que paecía un calcu del Troféu de 2013 onde tamién foron estos los dos primeros puestos. Anguaño, como l’añu anterior nun se van conocer los siguientes puestos de la clasificación final hasta la nueche de mañana domingu cuando se faiga entrega de los premios.

El primer gaiteru de los ocho qu’allegaben al concursu foi l’asturianu Jaime Álvarez Fernández, el mas mozu de los ocho que con namái quince año cuayo una magnífica actuación y que tuvo la responsabilidá d’abrir la competición, lo que de xuru nun xugó nel so favor, como suel asoceder davezu nesti tipu de concursos. Jaime ye hermanu d’Álvaro, el ganador del añu pasáu, y una auténtica promesa de la gaita asturiana, qu’entá participa n’Asturies na categoría infantil, onde vieno collechando numberosos premios. Y como Ávaro en 2013 abrió un concursu que paecía calcáu del de 2013.

Daniel  Fernández López foi’l primeru en presentar la propuesta gallega a la edición d’anguaño dando pasu depués al asturianu más veteranu y a lo postrero ganador, Jesús Fernández, que presentó la solidez que da yá la esperiencia de delles participaciones nestos últimos años. Víctor Antelo Presa, Jorge Gándara y Xesús Rodríguez completaron la representación gallega, primero que los asturianuos Fernando Vázquez Cárcaba y  Jorge Suárez Carbajal punxeran puntu final a la participación astur con una actuación que fixo taramellar casi toles quinieles que los espertos fixeren hasta esi momentu de la resultancia final, amosando col sudor en manes y rostru la problemática de tocar nos puestos caberos nesti tipu de concursos en plenu mes d’agostu.

Jesús Fernández algamó esti sábadu la 31 edición del Troféu Mac Crimmon que’l Festival de Lorient dedica a los solistes de gaita y nel que compiten tolos años cuatro gallegos y otros tantos asturianos. La mocedá y calidá de los instrumentistes dexó ablucaos otru añu más al públicu bretón. El Troféu Mac Crimmon de gaita asturiana y gallega cumplió esti sábadu trenta y ún años dende que col nome de Macallan lu ganara por primera vegada’l Gaiteru Asturianu Xuacu Amieva.

Llangréu (Asturies), 1962. Llicenciáu en Filoloxía Hispánica y Master en Desenvolvimientu Local pola Universidá d'Uviéu ye tamién espertu n'Alministración de Servidores Web pola Universidá de Granada. Doctorando de la Universidá del País Vascu, ye Profesor Acomuñáu de la Universidá Carlos III de Madrid, onde imparte l'asignatura de Técniques de Llocución y dirixe tamién el Cursu d'Espertu en Periodismu Dixital de la Universidá d'Uviéu y los cursos de branu sobre esta materia de la mesma universidá, cuntando con una nutrida participación nos cursos de branu de la Universidá de Cantabria y de la Complutense de Madrid, ente otres, siempres en relación col periodismu dixital.