Jaime Álvarez gana por sorpresa’l Mac Crimmon 2017

El gaiteru asturianu Jaime Álvarez ganó esti sábadu’l 32 Troféu de Gaita solista Mac Crimmon, y el tamién asturianu Fernando Vázquez Cárcaba foi segundu, na primer xornada completa del Festival Intercélticu de Lorient que va desenvolvese hasta’l domingu 13 d’esti mes d’Agostu na ciudá bretona de Lorient.

Inesperáu’l triunfu del asturianu Jaime Álvarez, qu’acoyó con sorpresa la so victoria, afitada nuna perfeuta interpretación de la parte bretona del concursu y una brillante interpretación de la música asturiana, que lu auparon al equlibriu interpretativu que siempres se necesita nesti concursu pa llograr el primer puestu. Jaime tuvo nel so hermanu Alvaro Álvarez, ganador tamién del Mac Crimmon, el meyor de los sos profesores pa preparar sobremanera la parte bretona viaxando amás a Bretaña pa preparala como ya ficiera l’hermanu. L’abrazu nel que se fundieron los dos al conocese’l resultáu ye’l exemplu d’un añu de fondu esfuerzu pa llegar a esta meta, tan mozu como Jaime, ensin algamar la mayoría d’edá llegal, pero hai muncho que llograda la musical.

Tan competitvu como tolos años, esta 32 edición del Troféu tenía a Jesús Fernández como referencia al querer repetir otra vuelta esti sábadu la victoria nel Troféu McCrimmon de gaita solista nel Festival de Lorient, dedicáu a les gaites asturianes y gallegues, como ficiera l’añu pasáu, pero con otros duros competidores ente los gaiteros asturianos que conformaben la delegación d’esti 2017, como a lo postrero amosaron Jaime Álvarez y Fernado Vázquez Cárcaba, primeru y segundu respeutivamente. Toos los ocho con muncha más esperiencia que nestos añosd’atrá y por mor d’ello con dificultá abonda pa prever favoritos.

Esta competición gaitera desendolcase tolos años nel marcu del Festival de Lorient -l’eventu intercélticu más importante del mundu-, dedicáu esti añu a Irlanda, y cuntará esti sábadu cola participación de gaiteros bien nomaos nesta disciplina. El ganador de 2016 foi, como dicíemos, l’asturianu Jesús Fernández, que yá ganara nel 2013 per delantre del gallegu Zeús Rodrígues y los asturianos Álvaro Álvarez y Jorge Suárez. L’añu pasáu tamién tuvo dellos de los competidores d’esti añu, colo que toos se conocen perbien, lo que fai enforma más competitivu’l concursu.

El concursu d’esti 2017 entamó col gallegu Manuel Ramón Seoane Sánchez, al que foron siguiendo un asturianu y un gallegu hasta completar los ocho participantes. Nel segundu llugar participara l’asturianu Xermán älvarez Castañón y tres d’elli fizolo’l gallegu Rafael Carracedo Crespo. El favoritu, l’asturianu Jesús Fernández González, llegaría nel cuartu llugar y daría pasu depués a la única muyer participante esti añu, la gallega Raquel Vilas Otero. Los tres últimos gaiteros en participar foron el más mozu del concursu, l’asturianu Jaime Álvarez Fernández, que ya sorprendiere l’añu pasáu, el gallegu Xesún Rodríguez Callejónn, con abonda esperieincia nel troféu y Fernándo Vázquez Carcaba, que fizo una interpretación asturiana de munchu altor y cuntó dende’l principiu pala terna definitiva.

Un total d’ocho participantes representen cada añu a les gaites asturianes y gallegues, que tendrán xunta Jesús Fernández a otru favoritu nel aniciu pa poer algamar el troféu: l’asturianu Álvaro Álvarez.

Los gaiteros tienen de pasar la dura preba del xuráu, compuestu por dos persones en cáuna de les trés variedaes interpretaes: música gallega, asturiana, y bretona.

Llangréu (Asturies), 1962. Llicenciáu en Filoloxía Hispánica y Doctor en quidá e innovación educativa pola Universidá d'Uviéu. Anguaño ye profesor de llingua española y lliteratura del cuerpu profesores de Secundaria del Principáu d'Asturies y Profesor Asociáu de la Universidá d'Uviéu nel Departamentu de Ciencies de la Educación. Periodista a lo llargo de más de 35 años, tien una llarga trayectoria llaboral en medios como La Voz d'Asturies, RNE, TVE y TPA ente otros.