Hevia presentó en Lorient dos años de la xera intercultural qu’espeya “Al son del Indianu”

Entemecer el son llatinu y el son asturianu ye daquñe enforma esbarioso si se quier algamar un productu musical que vaya más allá del emplegu nes romeríes. Y “Al son del Indianu”, el nuevu discu qu’Hevia presentó nesti Festival de Lorient, algamalo dafechu.

Son alrodiu tres años y mediu de trabayu silenciosu pa ser a algamar un entemecimientu non sólo musical sinon también fondamente cultural, identitariu, d’una bona parte de la viviencia de la asturies emigrante. Dende que tuviere en 2013 nesti mesmu Festival y ya presentare un avance de la so versión del “Asturias” d’Albeniz, vieno conformándose’l trabayu que presenta esti discu y qu’Hevia tien nidio que va ser afondáu nel futuru más próximu, como ya declarare na rueda de prensa de presentación del conciertu.

Un conciertu que contó con un apoyu más que mediu d’asistencia,  col públicu entregáu a un gaiteru que tuvo en Lorient la so referencia nel llargu camín d’aprendizaxe qu’un músicu que vien de la tradición tien d’algamar siempres. Y un conciertu que tuvo del so llau, un programa equilibráu y variáu nel que nun faltaron referencies concíes pol públicu.

Aires llatinos de mano nel conciertu con una tema, ‘El berrido’, que tamién incorpora referencies tradicionales asturianes. Pero sobremanera con propuestes como ‘Bachata para un intermedio’, onde partiendo d’una pieza relixosa ufierta una tema bailladera d’estrema ductilidad o la popular ‘Carretera d’Avilés’ que recibe un tratamientu caribeñu que lu arriquez.

Y nun podía faltar la tema más popular del heriedu indianu na Asturies de romería, la inolvidable “Guantanamera’.
Pero si hubo una pieza central nel conciertu, esta nun podía ser otra que l’encargu que va unos años fixéra-y el director del Festival de Lorient, Lisardo Lombardía, d’afaer a la gaita “Asturias” de Albéniz, qu’amás ufiertó primero n’una versión completa con tola orquesta a disposición y averándonos a la fin del conciertu n’una maraviyosa ufierta a la gaita y el tambor acompañáu de la so hermana María José.

Llangréu (Asturies), 1962. Llicenciáu en Filoloxía Hispánica y Master en Desenvolvimientu Local pola Universidá d'Uviéu ye tamién espertu n'Alministración de Servidores Web pola Universidá de Granada. Doctorando de la Universidá del País Vascu, ye Profesor Acomuñáu de la Universidá Carlos III de Madrid, onde imparte l'asignatura de Técniques de Llocución y dirixe tamién el Cursu d'Espertu en Periodismu Dixital de la Universidá d'Uviéu y los cursos de branu sobre esta materia de la mesma universidá, cuntando con una nutrida participación nos cursos de branu de la Universidá de Cantabria y de la Complutense de Madrid, ente otres, siempres en relación col periodismu dixital.