Banda Gaites Camin de Fierro

Miércoles 6 d’Agostu 2014 – Espace Marine

banda_gaites_camin_del_fierro1

La Banda Gaites Camín de Fierro, agrupación de los conceyos asturianos de Proaza, Santo Adriano y Teberga, crease nel añu 2002. Primeramente integrada por 12 miembros entama la so trayectoria, non ensin dificultaes, coles mires de dar a conocer la cultura y música tradicional asturiana. Progresivamente van incorporándose nuevos componentes cola ilusión d’algamar la meta propuesta hasta aportar a la cifra actual de 20 integrantes.

Cola denominación “Camín de Fierro” inténtase afigurar unu de los tantos puntos de mancomún de los trés conceyos. Ye equí onde apaez tola hestoria mineru-siderúrxica de la zona: nel valle había esplotaciones mineres d’onde salía’l mineral que yera unviáu por ferrocarril escontra la cuenca del Nalón, salida natural de la contorna, en Trubia. Esti tren mineru abrió’l camín ente los montes de los conceyos. Na actualidá, tresformóse nuna vía cicloturista, conocida a tolos niveles col nome de “Sienda del Osu”. Este ye l’orixe del nuesu nome, el camín de fierro que comunicaba los nuesos pueblos.

La mayor parte de los músicos vien de la Escuela de Música Tradicional de los Valles del Osu, perteneciente a la Mancomunidá de Conceyos de Proaza, Quirós, Santo Adriano y Teberga. Nella los alumnos fórmense tantu nes disciplines instrumentales como en Llinguaxe Musical y Folclor. Esta Escuela álzase como la cantera qu’asegura una fonte de nuevos talentos musicales que pasu ente pasu van entrando a formar parte de la Banda, dando continuidá al proyectu.

El directores de la Banda Gaites Camín de Fierro son:

Balbino Menéndez Suárez (Sabadía – 1977), mozu maestru gaiteru del que cabo destacar la so estensa esperiencia docente. Foi Director y Profesor de les Escueles Municipales de los Conceyos de Proaza y Teberga, respectivamente, mientres los años 1998-2001. Foi Profesor y Director Musical de la Banda de Gaites Villa d’Avilés mientres los años 1999-2005.

Dientro de la esperiencia musical puede destacar el so pasu pela Banda de Gaites Ciudad d’Uviéu mientres los años 1995-2000, según pola agrupación folk “Kandanín” (1998-2000).

Tamién impartió cursos y ponencies nel Centru de Profesores y Recursos d’Uviéu, nel Programa “Escueles Viaxeres” de la Conseyería d’Educación del Principáu d’Asturies, según nel Colexu Hispanu-Arxentín “La nuesa Señora de Cuadonga” del Centru Asturianu de Santa Fe (Rep. Arxentina).

Dientro del so llabor docente cabo destacar la publicación de dos trabayos didácticos que van responder a los títulos de “Ornamentación na Gaita Asturiana” y “Iniciación a la Gaita”.

Na actualidá ye Director y Profesor de la Escuela Municipal de la Mancomunidá Abarganes del Osu, Director de la Banda de Gaites “Camín de Fierro”, según profesor de Gaita y Conxuntu Instrumental de la Escuela Municipal de Música y Danza Tradicional “Manolo Quirós” del Conceyu d’Uviéu.

Arsenio Ruiz González (Fitoria – 1980) Formóse con prestixosos percusionistas como son Manuel Ángel Corderu González (técnica de tambor asturianu, caxa d’alta tensión y tambor tenor), Manuel Durán, Jim Collims y Rocio Garcia (percusión pa bandes de gaites) lo mesmo que de Orestes Barbachán (batería). Ye diplomáu en Danza y Folclor de la Escuela de Música Tradicional Manolo Quirós d’Uviéu ente los años 2001 y 2005, estos estudios fueron impartíos por Fernando M. de la Ponte Hevia.

Gana dellos premios na modalidá de pareya de gaita y tambor: 2 primeros premios nel Concursu de Gaita de Xixón 2006 y 2008, 2º y 3º del troféu Hermanos Cueli de Vidiago 2007 y 2008, 4º nel Concursu de Gaita de Xixón 2007, 5º y 6º puestu nel Concursu y Amuesa de Folklore Ciudad d’Uviéu. Y 1º y 3º na modalidá de Pareyes de Baille tamién nel Concursu y Amuesa de Folklore Ciudad d’Uviéu.

Anguaño forma parte de la Banda de Gaites Llariegu, como cajista, y ye profesor nes Escueles de Música Tradicional del G.F.I. El Ventolín, de Fitoria, B.G Villaviciosa-El Gaiteru, B.G.Xacara y ye director de percusión en: B.G Noega, B.G Camín de Fierro y B.G La Raitana.

Nel añu 2003 Collabora na grabación del discu de la Banda de Gaites Cantara y en 2008 graba con La Curuxa el so primera Cd, Toy de Camín.

Na interpretación musical la banda utiliza los siguientes preseos:

Gaites asturianes d’un solu roncón afinaes en Sib M y construyíes pol luthier Miguel Alonso Cachafeiro.

Caxes Majestic y/o tambores tradicionales.
Timbales Premier.
Bombu Andante.

 

Llangréu (Asturies), 1962. Llicenciáu en Filoloxía Hispánica y Doctor en quidá e innovación educativa pola Universidá d'Uviéu. Anguaño ye profesor de llingua española y lliteratura del cuerpu profesores de Secundaria del Principáu d'Asturies y Profesor Asociáu de la Universidá d'Uviéu nel Departamentu de Ciencies de la Educación. Periodista a lo llargo de más de 35 años, tien una llarga trayectoria llaboral en medios como La Voz d'Asturies, RNE, TVE y TPA ente otros.